ಎಂಥಾ ಬಲವಂತನೋ

 

ಎಂಥಾ ಬಲವಂತನೋ, ಕುಂತಿಯ ಸಂಜಾತನೋ  || ಪ ||

ಭಾರತಿಗೆ ಕಾಂತನೋ, ನಿತ್ಯ ಶ್ರೀಮಂತನೋ || ಅಪ ||

ರಾಮಚಂದ್ರಗೆ ಪ್ರಾಣನೋ, ಅಸುರ ಹೃದಯ ಬಾಣನೋ |
ಖಳರ ಗಂಟಲ ಗಾಣನೋ , ಜಗದೊಳಗೆ ಪ್ರವೀಣನೋ || ಎಂಥಾ ||

ಬಂಡಿ ಅನ್ನವನುಂಡನೋ, ಬಕನ ಪ್ರಾಣವ ಕೊಂಡನೋ |
ದ್ರೌಪದಿಗೆ ಗಂಡನೋ, ಭೀಮ ಪ್ರಚಂಡನೋ || ಎಂಥಾ ||

ವೈಷ್ಣವಾಗ್ರಗಣ್ಯನೋ, ಸಂಚಿತಾಗ್ರಪುಣ್ಯನೋ |
ದೇವಾವರೇಣ್ಯನೋ, ದೇವಾಶರಣ್ಯನೋ || ಎಂಥಾ ||

ಮಧ್ವಶಾಸ್ತ್ರ ರಚಿಸಿದನೋ, ಸದ್ವೈಷ್ಣವರ ಸಲಹಿದನೋ |
ಉಡುಪಿಲಿ ಕೃಷ್ಣನ ನಿಲಿಸಿದನೋ, ಪುರಂದರ ವಿಠಲಗೆ ದಾಸನೋ || ಎಂಥಾ ||