ಏನೆಂದು ಕೊಂಡಾಡಿ

 

 ಏನೆಂದು ಕೊಂಡಾಡಿ ಸ್ತುತಿಸಲೋ ದೇವ 
ನಾನೇನು ಬಲ್ಲೆನು ನಿನ್ನ ಮಹಿಮೆಗಳ  ||ಪ||

ಹರಿಮುಕುಂದನು ನೀನು ನರಜನ್ಮ ಹುಳ ನಾನು 
ಪರಮಾತ್ಮನು ನೀನು ಪಾಮರನು ನಾನು |
ಗರುಡ ಗಮನನು ನೀನು ಮರುಳು ಪಾಪಿಯು ನಾನು 
ಪರಂಜ್ಯೋತಿಯು ನೀನು ದುರುಳ ತಿರುಕನು ನಾನು ||ಏನೆಂದು||

ವಾರಿಧಿಶಯನಾದ ಕಾರುಣ್ಯನಿಧಿ ನೀನು 
ಘೋರದಿಂದಿಹ ಕಾಮಿಕ್ರೋಧಿ ನಾನು |
ಈರೇಳು ಭುವನದೊಳು ಇರುವ ಮೂರುತಿ ನೀನು 
ದೂರಿ ನಿನ್ನನು ಬೈವ ದುಷ್ಟನು  ನಾನು ||ಏನೆಂದು||

ಅಣುರೇಣು ತೃಣಗಳಲಿ ಪರಿಪೂರ್ಣನು ನೀನು 
ಕ್ಷಣಕ್ಷಣಕೆ ಅವಗುಣದ ಕುಕರ್ಮಿ ನಾನು |
ವಾಣಿಯರಸನ ಪೆತ್ತ ವೈಕುಂಠಪತಿ ನೀನು 
ಕ್ಷಣಭಂಗುರ ತನುವಿನ ಗೊಂಬೆ ನಾನು ||ಏನೆಂದು||

ತಿರುಪತಿಯ ವಾಸ ಶ್ರೀವೆಂಕಟೇಶನೆ ನೀನು
ಸ್ಮರಿಸಿ ನಿನ್ನಯ ಪಾದ ಬದುಕುವನು ನಾನು |
ಬಿರುದುಳ್ಳವನು ನೀನು ಮೊರೆಹೊಕ್ಕವನು ನಾನು 
ಸಿರಿ ಕಾಗಿನೆಲೆಯಾದಿ ಕೇಶವನು ನೀನು ||ಏನೆಂದು||