ಕಾಯೊ ಕರುಣಾಕರನೆ

 

ಕಾಯೊ ಕರುಣಾಕರನೆ ಕಡು ಪಾಪಿ ನಾನು

ನ್ಯಾಯವೆಂಬುದು ಎನ್ನೊಳೆಳ್ಳನಿತಿಲ್ಲ ||ಪ||

ಎಣ್ಣೆ ಕೊಪ್ಪರಿಗೆಯೊಳ್ಬಿದ್ದು ಸ್ತುತಿಸಿದವನಲ್ಲ

ಚಿನ್ನ ಪಿತನ ಬಾಧೆಗೊಳಗಾದವನಲ್ಲ |

ಬಣ್ಣಗೆಟ್ಟಡವಿಯಲಿ ತಿರುಗುವನು ನಾನಲ್ಲ

ಹೆಣ್ಣನೊಲ್ಲದೆ ನಿನ್ನ ಬಂಟನಾದವನಲ್ಲ ||ಕಾಯೊ||

ಬಲು ಬೇಡಿದುದ ನೀವ ಬಲಿಚಕ್ರವರ್ತಿಯಲ್ಲ

ನಲಿನಲಿದು ಅರ್ಪಿಸಲು ವಿದುರನಲ್ಲ  |

ಕಲಿಗಳೊಳು ದ್ರೋಣ ಫಲಗುಣ ಭೀಷ್ಮ ನಾನಲ್ಲ

ಕಳವಳದಿ ಕರೆದ ಪಾಂಚಾಲಿ ನಾನಲ್ಲ ||ಕಾಯೊ||

ಉರಗರಾಜನ ತೆರದಿ ಹಾಸಿಗಾದವನಲ್ಲ

ಗರುಡನಂದದಿ ಪೊತ್ತು ತಿರುಗಿದವನಲ್ಲ |

ಸಿರಿಧರನೆ ಕಾಗಿನೆಲೆಯಾದಿಕೇಶವ ನಿನ್ನ

ಚರಣ ಡಿಂಗರಿಗ ಮಾತ್ರ ನಾನಾಗಿಹೆನೆಂದು ||ಕಾಯೊ||