ಸುಂದರಿ

 

ಸುಂದರಿ ರಂಗನ ತಂದು ತೋರ 

ಒಂದಾರ ಘಳಿಗ್ಯಾಗಾ|| ಪ ||

ಮತ್ಸ್ಯನಾಗಿ ಮೊದಲಿನಲ್ಲಿ , ಕೂರ್ಮನಾಗಿ ಬಂದು, 

ಕೊರೆನು ಕಾಯ್ದ  ದೈತ್ಯರ ಕೊಂದ ಬಹು ಕ್ರೋಧದಿಂದ |

ದುರುಳ ಹಿರಣ್ಯಕನ ಕರುಳು ಬಗೆದು ತೋಡಿ

ಕೊರಳೊಳಗೆ ಧರಿಸಿದನು ಸರಗಳನ್ನೇ ಮಾಡಿ |

ಕೊರಳು ಕೊಯ್ದ ಎಲ್ಲಮ್ಮನ ಪುತ್ರನಾಗಿ ಕಾದಿ |

ಸರಳ ಬಾಣವನ್ನೇ ಹೂಡಿ ಲಂಕಾದ್ರಿ ಮಥನ ಮಾಡಿ |

ಎರಳ ಗಂಗೆಯರ ಪತಿವೃತೆಯರ ಕೆಡಿಸಿದನು ಕೂಡಿ |

ಮರಳು ತನದಿಂದ ಸೆಗೆದ ಹಯವನೇರಿ ಓಡಿ ||ಸುಂದರಿ||

ನೀರೊಳು ಮೀನನಾಗಿ ಅಲೆವ,  ಧರೆ ಭಾರವನ್ನು ಹೊರುವ |

ವರಹನಾಗಿ ನರಕಾಸುರನನು ತರೆವ, ಕೋರೆಲಿ ಮಣ್ಣು ಬಗೆವ |

ಒಡೆ ಮುಡಿ ಕಂಬದಿಂದ ಘುಡಘುಡಿಸುತ ಬರುವ |

ಧೃಢವುಳ್ಳ ಬಲಿಚಕ್ರವರ್ತಿ ಪಾಲಿಸಿದ ವರವಾ |

ಕೊಡಲಿ ಪಿಡಿದು ಹಡೆದ ತಾಯಿ ಶಿರವಾ ಕಡಿತಾಲಿರುವ |

ಮಡದಿ ಒಯ್ದ ರಾವಣನ ಕಡೆದು ದಶ ಶಿರವಾ |

ದಾಡಿ ಬಿಟ್ಟು ತಿರುಗುವಂಥ ತ್ರಿಪುರರರಂಥಪುರವಾ | 

ಏರಿಸಿದ ಅಶ್ವಮೇಧ ಅರ್ಥಿಯಿಂದ ಮೆರೆವಾ ||ಸುಂದರಿ||

ಬ್ರಹ್ಮಗೆ ಒಲಿದು ವೇದವ ತರುವ, ಬ್ರಹ್ಮಾಂಡವನ್ಹೊರುವ |

ಗಮ್ಮೀಲಿ ಕಾಯ್ದವ,ನಾಗಿರುವ, ಸುಮ್ಮನೆ ಹೋಗಿ ಬರುವಾ |

ಸಿಟ್ಟಿನಿಂದ ನಾರಸಿಂಹ ರೂಪನಾಗಿ ಬಂದ |

ಸೃಷ್ಟಿಯೊಳು ಪರಶುರಾಮ ರೇಣುಕೆಯ ಕಂದ |

ಕಷ್ಟವನ್ನಾಚರಿಸಿದನು ರಾಮ ವನವಾಸದಿಂದ |

ಕೃಷ್ಣಾವತಾರ ಬೌದ್ಧ ಕಲ್ಕಿ ರೂಪ ಒಂದೊಂದಾ |

ಇಷ್ಟುಪರಿ ವರ್ಣಿಸುತ ಹತ್ತಾವತಾರ ಚೆಂದ |

ಸೃಷ್ಠಿಯೋಳು ಕಾಗಿನೆಲೆ ಆದಿಕೇಶವನಿಂದಾ ||ಸುಂದರಿ||