ಬದುಕಿದೆನು ಬದುಕಿದೆನು

 

ಬದುಕಿದೆನು ಬದುಕಿದೆನು ಭವವೆನಗೆ ಹಿಂಗಿತು

ಪದುಮನಾಭನ ಪಾದದೊಲುಮೆ ಎನಗಾಯಿತು ||ಪ||

ಹರಿ ತೀರ್ಥ ಪ್ರಸಾದವಿಂದೆನಗೆ ದೊರಕಿತು

ಹರಿಕಥಾಮೃತವೆನ್ನ ಕಿವಿಗೊದಗಿತೋ |

ಹರಿದಾಸರು ಎನ್ನ ಬಂಧು ಬಳಗಾದರು

ಹರಿಮುದ್ರೆ ಎನಗಾಭರಣವಾಯಿತು ||ಬದುಕಿದೆನು||

ಮುಕ್ತರಾದರು ಎನ್ನ ನೂರೊಂದು ಕುಲದವರು

ಮುಕ್ತಿ ಮಾರ್ಗಕೆ ಯೋಗ್ಯ ನಾನಾದೆನು |

ಅಕಳಂಕ ಶ್ರೀಹರಿಯ ಭಕುತಿಗೆ ಮನವೆಳೆದು

ವ್ಯಕ್ತವಾಯಿತು ನಾಲಿಗೆಯೊಳು ಹರಿನಾಮ ||ಬದುಕಿದೆನು||

ಹಿಂದೆನ್ನ ಸಂತತಿಗೆ ಸಕಲ ಸಾಧನವಾಯಿತು

ಮುಂದೆನ್ನ ಜನ್ಮವು ಸಫಲವಾಯಿತು |

ತಂದೆ ಶ್ರೀ ಪುರಂದರ ವಿಠಲರಾಯ

ಬಂದು ಹೃದಯದಲಿ ನೆಲೆಯಾಗಿ ನಿಂತ ||ಬದುಕಿದೆನು||