ಕಪ್ಪು ಎನ್ನಲು ಬೇಡವೋ

 

ಕಪ್ಪು ಎನ್ನಲು ಬೇಡವೋ ಶ್ರೀ ಹರಿಯನ್ನು ಕಪ್ಪು ಎನ್ನಲು ಬೇಡವೋ ||ಪ||

ಹರಿಯ ಮಧ್ಯದಿ ಕಪ್ಪು, ಹಾಲಾಹಲವು ಕಪ್ಪು, 
ಪರಮ ಅಶ್ವವೆ ಕಪ್ಪು ,ಪಾರಿಜಾತವೆ ಕಪ್ಪು |
ಕರಿಗಳೆಲ್ಲವು ಕಪ್ಪು, ಹರಿಹಯ ನೀಲಿಕಪ್ಪು |
ಅಂಗನೆ ಕೇಳು ಜಗದೊಳಗೆ ಗುಲಗಂಜಿ ಶಿರಗಳೆಲ್ಲವು ಕಪ್ಪು ||ಕಪ್ಪು||

ಬರೆವ ಕಂಟವೆ ಕಪ್ಪು, ಭಾರದ್ವಾಜವೆ ಕಪ್ಪು, 
ವರರಾಘವನ ಪಾವನಾಂಗವೆ ಕಪ್ಪು |
ಎರೆವ ಭೂಮಿಯು ಕಪ್ಪು, ಎಸೆವ ಕಸ್ತೂರಿ ಕಪ್ಪು |
ಅಂಗನೆ ಕೇಳು ಮೂರುಲೋಕದಿ ನಮ್ಮ ಮುದ್ದುಕೃಷ್ಣನೆ ಕಪ್ಪು ||ಕಪ್ಪು||

ಶಾಲಿಗ್ರಾಮವೆ ಕಪ್ಪು, ಸರಸಿಜೋದ್ಭವ ಕಪ್ಪು, 
ಲೋಲಂಬಗಳು ಕಪ್ಪು, ರುಚಿತ ಕೋಗಿಲೆ ಕಪ್ಪು |
ಕಾಲಿಂದೀ ನದಿಯೆ ಕಪ್ಪು,ಕರಿಮಣಿಸರವೆ ಕಪ್ಪು |
ಅಂಗನೆ ಕೇಳು ಪುರಂದರವಿಠಲನ ಮೂರುತಿ ಕಪ್ಪು ||ಕಪ್ಪು||