ಶಿವನೇ ನಾ ನಿನ್ನ

 

ಶಿವನೇ ನಾ ನಿನ್ನ ಸೇವಕನಯ್ಯ |

ದುರ್ಮನ ಬಿಡಿಸಯ್ಯಾ…. ||ಪ||

ಭವಮೋಚಕ ಭಾಗವತಶಾಸ್ತ್ರವನು

ಅವನೀಶಗೆ ಪೇಳ್ದವ ನೀನಲ್ಲವೆ || ಅ.ಪ ||

ವೈಕಾರಿಕ ತೈಜಸ ತಾಮಸವೆಂಬ, ತ್ರೈತತ್ತ್ವಗಳೆಂಬ

ಸಾಕಾರಿ ಶಾರ್ವರಿಧವಧರ ಸಾಂಬ, ಸುರಪಾದ್ಯರ ಬಿಂಬ |

ವೈಕಲ್ಯಾಸ್ಪದವ ಕಳೆದೊಮ್ಮಿಗೆ

ವೈಕುಂಠಕೆ ಕರೆದೊಯ್ ಕರಿಗೊರಳಾ ||ಶಿವನೇ||

ಮೃತ್ಯುಂಜಯ ಮುಪ್ಪುರಹರ ಮಹದೇವ, ದೇವರ್ಕಳಕಾವ

ಸ್ತುತ್ಯಾದ್ರಿಜ ದಿತಿಜತತೀವನದಾವಾ, ದುರಿತಾಂಬುಧಿನಾವ| 

ಕೃತ್ತಿವಾಸ ಎನ್ನತ್ಯಪರಾಧಗಳೆತ್ತಿಣಿಸದೆ ಕೃತಕೃತ್ಯನ ಮಾಡೈ ||ಶಿವನೇ||

ಸ್ಫಟಿಕಾಭ ಕಪಾಲಿ ಕಾಮಿತಫಲದಾ, ಫಲ್ಗುಣಸಖ ಶ್ರೀದ

ವಿಠಲ ವಿತ್ತಪಮಿತ್ರ ದ್ವಿರದ, ಚರ್ಮಾಂಬರನಾದ |

ಕುಟಿಲರಹಿತ ಧೂರ್ಜಟಿ ವೃಷಭಧ್ವಜ

ನಿಟಿಲನಯನ ಸಂಕಟವ ನಿವಾರಿಸೊ ||ಶಿವನೇ ||