ಬೇವು ಬೆಲ್ಲದೊಳಿಡಲೇನು

 

 ಬೇವು ಬೆಲ್ಲದೊಳಿಡಲೇನು  ಫಲಾ
ಹಾವಿಗೆ ಹಾಲೆರೆದೇನು  ಫಲಾ ||ಪ||

ಕುಟಿಲವ  ಬಿಡದಿಹ  ಕುಜನರು  ಮಂತ್ರವ 
ಪಠನೆಯ ಮಾಡಿದರೇನು ಫಲ|
ಸಟೆಯನ್ನಾಡುವ  ಮನುಜರ ಮನದಲಿ
ವಿಠಲನ ನೆನೆದರೆ ಏನು ಫಲಾ ||ಬೇವು||

ಕಪಟತನದಿ ವಂಚಿಸುವ ಮನುಜರು 
ಜಪಗಳ ಮಾಡಿದರೆ ಏನು ಫಲಾ |
ಕುಪಿತ ಬುದ್ಧಿಯನು ತ್ಯಜಿಸದೆ  ನಿತ್ಯದಿ ,
ಉಪವಾಸ ಇದ್ದರೆ  ಇನ್ನೇನು ಫಲಾ ||
ಮಾತಾ ಪಿತರನು ಬಳಲಿಸುವಾ  ಮಗ 
ಯಾತ್ರೆಯ ಮಾಡಿದರೇನು ಫಲಾ |
ಘಾತಕ ತನವನು  ಬಿಡದೆ ನಿರಂತರ 
ಗೀತೆಯನೋದಿದರೇನು  ಫಲಾ ||ಬೇವು||

ಪತಿಯನು ನಿಂದಿಸಿ  ಬೊಗಳುವ ಸತಿಯರು  
ವ್ರತಗಳ ಮಾಡಿದರೇನು ಫಲ |
ಅತಿಥಿಗಳ ಎಡೆಯಲಿ  ಭೇದವ ಮಾಡುತ 
ಗತಿಯನು ಬಯಸಿದರೆ ಏನು ಫಲಾ ||
ಹೀನ ಕೃತ್ಯಗಳ  ಮಾಡುತ ನದಿಯಲಿ 
ಸ್ನಾನವ  ಮಾಡಿದರೇನು ಫಲಾ |
ಶ್ರೀನಿಧಿ ಪುರಂದರ ವಿಠಲನ ನೆನೆಯದೆ 
ಮೌನವ ಮಾಡಿದರೇನು ಫಲಾ  ||ಬೇವು||