ಹರಿ ನಾರಾಯಣ

 

ಹರಿ ನಾರಾಯಣ ಹರಿ ನಾರಾಯಣ

ಹರಿ ನಾರಾಯಣ ಎನು ಮನವೆ ||ಪ||

ನಾರಾಯಣನೆಂಬ ನಾಮದ ಬೀಜವ

ನಾರದ ಬಿತ್ತಿದ ಧರೆಯೊಳಗೆ ||ಅಪ||

ತರಳ ಧೃವನಿಂದ ಅಂಕುರಿಸಿತು ಅದು

ವರ ಪ್ರಹ್ಲಾದನಿಂದ ಮೊಳಕೆ ಆಯ್ತು |

ಧರಣೀಶ ರುಕುಮಾಂಗದನಿಂದ ಚಿಗುರಿತು

ಕುರುಪಿತಾಮಹನಿಂದ ಹೂವಾಯ್ತು ||ಹರಿ||

ವಿಜಯನ ಸತಿಯಿಂದ ಕಾಯಾಯ್ತು ಅದು

ಗಜೇಂದ್ರನಿಂದ ದೊರೆ ಹಣ್ಣಾಯ್ತು |

ಶ್ರೀ ಶುಕಮುನಿಯಿಂದ ಪರಿಪಕ್ವವಾಯಿತು

ಅಜಮಿಳ ತಾನುಂಡು ರಸಸವಿದ ||ಹರಿ||

ಕಾಮಿತ ಫಲವೀವ ನಾಮವೊಂದಿರಲಾಗಿ

ಹೋಮ ನೇಮ ಜಪ ತಪವೇಕೆ |

ಸ್ವಾಮಿ ಶ್ರೀ ಪುರಂದರ ವಿಠಲನ ನಾಮವ

ನೇಮದಿಂದಲಿ ನೀ ನೆನೆ ಮನವೆ ||ಹರಿ||