ಆರಂಭದಲಿ ನಮಿಪೆ

 

 ಆರಂಭದಲಿ ನಮಿಪೆ ಬಾಗಿ ಶಿರವ |
ಹೇರಂಬ ನೀನೊಲಿದು ನೀಡೆಮಗೆ ವರವ ||ಪ||

ದ್ವಿರದವದನನೆ ನಿರುತ ದ್ವಿರದ ವಂದ್ಯನ ಮಹಿಮೆ 
ಹರುಷದಲಿ ಜಿಹ್ವೆ ಕರ ಎರಡರಿಂದ |
ಬರೆದು ಪಾಡುವುದಕ್ಕೆ ಬರುವ ವಿಘ್ನವ ತರಿದು 
ಕರುಣದಿಂದಲಿ ಎನ್ನ ಕರ ಪಿಡಿದು ಸಲಹೆಂದು ||ಆರಂಭದಲಿ||

ಕುಂಭಿಣಿಜೆ ಪತಿರಾಮ ಜಂಬಾರಿ ಧರ್ಮಜರು 
ಅಂಬರಾಧಿಪ ರಕುತಾಂಬರನೆ ನಿನ್ನ || 
ಸಂಭ್ರಮದಿ ಪೂಜಿಸಿದರೆಂಬ ವಾರುತೆ ಕೇಳಿ 
ಹಂಬಲವ ಸಲಿಸೆಂದು ನಂಬಿ ನಿನ್ನಡಿಗಳಿಗೆ ||ಆರಂಭದಲಿ||

ಸೋಮಶಾಪದ ವಿಜಿತ ಕಾಮ ಕಾಮಿತದಾತ 
ವಾಮದೇವನ ತನಯ ನೇಮದಿಂದ || 
ಶ್ರೀ ಮನೋಹರನಾದ ಶ್ಯಾಮಸುಂದರ ಸ್ವಾಮಿ 
ನಾಮ ನೆನೆಯುವ ಭಾಗ್ಯ ಪ್ರೇಮದಲಿ ಕೊಡು ಎಂದು ||ಆರಂಭದಲಿ||