ಮುಳ್ಳು ಕೊನೆಯ ಮೇಲೆ

 

ಮುಳ್ಳು ಕೊನೆಯ ಮೇಲೆ ಮೂರು ಕೆರೆಯ ಕಟ್ಟಿ 

ಎರಡು ತುಂಬದು ಒಂದು ತುಂಬಲೇ ಇಲ್ಲ||ಪ||

ತುಂಬಲಿಲ್ಲದ ಕೆರೆಗೆ ಬಂದರು ಮೂವರು ಒಡ್ಡರು

ಇಬ್ಬರು ಕುಂಟರು ಒಬ್ಬಗೆ ಕಾಲೇ ಇಲ್ಲ||ಅ ಪ||

ಕಾಲಿಲ್ಲದ ಒಡ್ಡಗೆ ಕೊಟ್ಟರು ಮೂರು ಎಮ್ಮೆಗಳ 

ಎರಡು ಬರಡು ಒಂದಕ್ಕೆ ಕರುವೇ ಇಲ್ಲ|

ಕರುವಿಲ್ಲದ ಎಮ್ಮೆಗೆ ಕೊಟ್ಟರು ಮೂರು ಹೊನ್ನುಗಳ

ಎರಡು ಸವಕಲು ,ಒಂದು ಸಲ್ಲಲೇ ಇಲ್ಲ||ಮುಳ್ಳು||

ಸಲ್ಲದಿದ್ದ ಹೊನ್ನಿಗೆ ಬಂದರು ಮೂವರು ನೋಟಗಾರರು ,

ಇಬ್ಬರು ಕುರುಡರು ಒಬ್ಬಗೆ ಕಣ್ಣೇ ಇಲ್ಲ|

ಕಣ್ಣಿಲ್ಲದ ನೋಟಗಾರಗೆ ಕೊಟ್ಟರು ಮೂರು ಊರುಗಳ

ಎರಡು ಹಾಳು ,ಒಂದಕ್ಕೆ ಒಕ್ಕಲೇ ಇಲ್ಲ||ಮುಳ್ಳು||

ಒಕ್ಕಲಿಲ್ಲದ ಊರಿಗೆ ಬಂದರು ಮೂವರು ಕುಂಬಾರರು

ಇಬ್ಬರು ಚೊಂಚರು ,ಒಬ್ಬಗೆ ಕೈಯೇ ಇಲ್ಲ|

ಕೈಯಿಲ್ಲದ ಕುಂಬಾರನು ಮಾಡಿದನು ಮೂರು ಮಡಕೆಗಳ

ಎರಡು ಒಡಕು ಒಂದಕ್ಕೆ ಬುಡವೇ ಇಲ್ಲ||ಮುಳ್ಳು||

ಬುಡವಿಲ್ಲದ ಮಡಕೆಗೆ ಹಾಕಿದರು ಮೂರು ಅಕ್ಕಿಕಾಳ

ಎರಡು ಬೇಯದು ,ಒಂದು ಬೇಯಲೇ ಇಲ್ಲ|

ಬೇಯಲಿಲ್ಲದ ಅಕ್ಕಿಗೆ ಬಂದರು ಮೂವರು ನೆಂಟರು

ಇಬ್ಬರು ಉಣ್ಣರು ,ಒಬ್ಬಗೆ ಹಸಿವೇ ಇಲ್ಲ||ಮುಳ್ಳು||

ಹಸಿವಿಲ್ಲದ ನೆಂಟಗೆ ಕೊಟ್ಟರು ಮೂರು ಟೊಣೆಪೆಗಳ

ಎರಡು ತಾಕದು ,ಒಂದು ತಾಕಲೇ ಇಲ್ಲ|

ತಾಕಲಿಲ್ಲದ ಟೊಣೆಪೆಯ ತಾಕಿಸಿ ಸದ್ಗತಿಯನು

ಈಯಬೇಕು ಪುರಂದರ ವಿಠ್ಠಲರಾಯ ||ಮುಳ್ಳು||