ಮಾನವ ಜನ್ಮ ದೊಡ್ಡದು

ಇದ ಹಾನಿ ಮಾಡಲು ಬೇಡಿ ಹುಚ್ಚಪ್ಪಗಳಿರಾ ||ಪ||

ಕಣ್ಣು ಕೈ ಕಾಲ್ಕಿವಿ ನಾಲಗೆ ಇರಲಿಕ್ಕೆ

ಮಣ್ಣುಮುಕ್ಕಿ ಮರಳಾಗುವರೆ |

ಹೊನ್ನು ಹೆಣ್ಣಿಗಾಗಿ ಹರಿನಾಮಾಮೃತ

ಉಣ್ಣದೆ ಉಪವಾಸ ಮಾಡುವರೇ ||ಮಾನವ||

ಕಾಲನ ದೂತರು ಕಾಲ್ಪಿಡಿದೆಳೆವಾಗ

ತಾಳು ತಾಳೆಂದರೆ ಕೇಳುವರೇ?

ಧಾಳಿ ಬಾರದ ಮುನ್ನ ಧರ್ಮವ ಗಳಿಸಿರೊ

ಹಾಳು ಸಂಸಾರ ಸುಳಿಗೆ ಸಿಲುಕುವರೇ? ||ಮಾನವ||

ಏನು ಕಾರಣ ನೀವು ಯದುಪತಿಯ ಮರೆತಿರಿ

ಧನ ಧಾನ್ಯ ಸತಿ ಸುತರು ಕಾಯುವರೇ ?

ಇನ್ನಾದರು ನೀವು ಏಕಭಾವದಿಂದ

ಶ್ರೀ ಹರಿ ಪುರಂದರವಿಠಲನ ಭಜಿಸಿರೊ ||ಮಾನವ||

ಭಜನೆಗಳು