ಹಣ್ಣು ಬಂದಿದೆ ಕೊಳ್ಳಿರೋ

 

ಹಣ್ಣು ಬಂದಿದೆ ಕೊಳ್ಳಿರೋ ನೀವೀಗ

ಹಣ್ಣು ಬಂದಿದೆ ಕೊಳ್ಳಿರೋ ||

ಚೆನ್ನಬಾಲಕೃಷ್ಣನೆಂಬೊ ಚೆನ್ನಾದ ಬಾಳೆಯ 

ಹಣ್ಣು ಬಂದಿದೆ ಕೊಳ್ಳಿರೋ ನೀವೀಗ

ಹಣ್ಣು ಬಂದಿದೆ ಕೊಳ್ಳಿರೋ        ||ಪ||

ಹವ್ಯಕವ್ಯದ ಹಣ್ಣು, ಸವಿವ ಸಕ್ಕರೆಹಣ್ಣು

ಭವರೋಗಗಳನೆಲ್ಲ ಕಳೆವ ಹಣ್ಣು|

ನವನೀತ ಚೋರನೆಂಬ ಜವನಾ ಅಂಜಿಪ ಹಣ್ಣು

ಅವನಿಯೊಳು ಶ್ರೀರಾಮನೆಂಬೊ ಹಣ್ಣು                 ||ಚೆನ್ನಬಾಲಕೃಷ್ಣ||

ಕೊಳೆತು ಹೋಗುವುದಲ್ಲ, ಹುಳಿತು ಹೋಗುವುದಲ್ಲ

ಕಳೆದು ಬಿಸಾಡಿಸಿ ಕೊಳ್ಳುವುದಲ್ಲ |

ಅಳೆದು ಕೊಂಬುವುದಲ್ಲ ಗಿಳಿ ಕಚ್ಚಿ ತಿಂಬೊದಲ್ಲ

ಒಳಿತಾದ ಹರಿಯೆಂಬೊ ಮಾವಿನಹಣ್ಣು               ||ಚೆನ್ನಬಾಲಕೃಷ್ಣ||

ಕೆಟ್ಟು ನಾರುವುದಲ್ಲ, ಬಿತ್ತಿ ಬೆಳೆಯೋದಲ್ಲ

ಕಷ್ಟದಿ ಹಣಕೊಟ್ಟು ಕೊಂಬುವುದಲ್ಲ |

ಸೃಷ್ಟಿಯೊಳಗೆ ನಮ್ಮ ಪುರಂದರವಿಠಲ

ಕೃಷ್ಣರಾಯನೆಂಬೊ ಶ್ರೇಷ್ಠವಾದ ಹಣ್ಣು                ||ಚೆನ್ನಬಾಲಕೃಷ್ಣ||