ಶಂಭೋ ಸ್ವಯಂಭು ಸಂಭವ

 

ಶಂಭೋ ಸ್ವಯಂಭು ಸಂಭವ,  ನಂಬಿದೆ ಕಾಯೊ

ಜಂಭಾರಿನುತ ಅಭವ |

ಅಂಬರ ಪುರಹರ ಸಾಂಬ ತ್ರಿಯಂಬಕ

ಶಂಬರಾರಿ ರಿಪುಗಂಭೀರ ಕರುಣಿ || ಪ ||

ಭಸಿತ ಭೂಷಿತ ಶರೀರ, ಭಕ್ತರುದ್ಧಾರ

ವಿಷಕಂಠ ದುರಿತಹರ |

ಪಶುಪತಿ ಫಣಿಪಹಾರ, ಪಾವನಕಾರ

ತ್ರಿಶೂಲ ಡಮರುಗಧರ |

ನೊಸಲನಯನ ವಿಕಸಿತಾಂಬುಜ ಮುಖ

ಶಶಿಧರ ಮತ್ತರಕ್ಕಸ ಮದ ಮರ್ದನ |

ಘಸಣೆಗೊಳಿಪ ತಾಮಸವ ಕಳೆದು   

ಮಾನಸದಲಿ ರಂಗನ ಬಿಸಜ ಪಾದವ ತೋರೊ ||ಶಂಭೋ||

ರಜತ ಪರ್ವತ ನಿವಾಸ, ನಿರ್ಮಲ ಭಾಸ

ಗಜ ದೈತ್ಯನಾಶ ಗಿರೀಶ |

ಸುಜನರ ಮನೋವಿಲಾಸ, ವ್ಯೋಮಕೇಶ

ತ್ರಿಜಗದಲ್ಲಣ ಗೌರೀಶ |

ಅಜಸುತನಧ್ವರ ಭಜನೆಯ ಕೆಡಸಿದೆ

ಅಜಗರ ಮಂದಿ ಗಜಮುಖ ಜನಕನೆ |

ಗಜಗಮನ ಮುನಿ ತನುಜನ ಕಾಯ್ದನೆ

ವ್ರಜಮುನಿ ವಂದಿತ ಭಜಿಸುವೆ ನಿನ್ನನು ||ಶಂಭೋ||

ಮಧರಾಪುರಿ ನಿಲಯ, ಮೃತ್ಯುಂಜಯ

ಸದಮಲ ಸುಮನಗೇಯ |

ಸದಾ ನಮಿಪರ ಹೃದಯ, ದೊಳಗುಳ್ಳ 

ಭಯಸದೆಯುತ್ತ ಕೊಡು ಅಭಯ |

ಸದಾಶಿವ ಜಾಹ್ನವಿ ಧರಕೃತ ಮಾಲಾ

ನದತೀರದಿ ವಾಸವಾಗಿಪ್ಪ ಸೌಂದರ್ಯ |

ಮಧುಪುರಿ ವಿಜಯವಿಠ್ಠಲನ ಪದಾಬ್ಜಕೆ

ಮಧುಪನೆನಿಪ ಪಂಚವದನ ಕೈಲಾಸ ||ಶಂಭೋ||