ಬಾರೋ ಗುರುರಾಘವೇಂದ್ರ

ಬಾರಯ್ಯ ಬಾ ಬಾ, ಬಾರೋ ಗುರುರಾಘವೇಂದ್ರ || ಪ ||

ಹಿಂದುಮುಂದಿಲ್ಲೆನಗೆ ನೀ ಗತಿ

ಎಂದು ನಂಬಿದೆ ನಿನ್ನ ಪಾದವ

ಬಂಧನವ ಬಿಡಿಸೆನ್ನ ಕರಪಿಡಿ

ನಂದಕಂದಮುಕುಂದ ಬಂಧೋ || ಅ ಪ ||

ಸೇವಕನೆಲವೊ ನಾನು, ಧಾವಿಸಿ ಬಂದೆನು

ಸೇವೆ ನೀಡೆಲೊ ನೀನು |

ಸೇವಕನ ಸೇವೆಯನು ಸೇವಿಸಿ

ಸೇವ್ಯ-ಸೇವಕ ಭಾವವೀಯುತ

ಠಾವುಗಾಣಿಸಿ ಪೊರೆಯೊ ಧರೆಯೊಳು

ಪಾವನಾತ್ಮಕ ಕಾವ ಕರುಣಿ || ಬಾರೋ ||

ಕರೆದರೆ ಬರುವಿಯೆಂದು , ಸಾರುವುದು ಡಂಗುರ

ತ್ವರಿತದಿ ಒದಗೋ ಬಂದು |

ಜರಿಯ ಬೇಡವೊ ಬರಿದೆ ನಿನ್ನಯ

ವಿರಹ ತಾಳದೆ ಮನದಿ ಕೊರಗುವೆ

ಹರಿಯ ಸ್ಮರಣೆಯ ನಿರುತದಲಿ ಎನಗೆ

ಹರುಷದಲಿ ನೀನಿರುತ ಕೊಡುತಲಿ || ಬಾರೋ ||

ನರಹರಿಪ್ರಿಯನೆ ಬಾ , ಗುರುಶ್ರೀಶವಿಠ್ಠಲನ

ಕರುಣಾಪಾತ್ರನೆ ಬೇಗ ಬಾ |

ಗುರುವರನೆ ಪರಿಪೋಷಿಸೆನ್ನನು

ಮರೆಯದಲೆ ತವಚರಣಕೋಟಿಯಲಿರಿಸಿ

ಚರಣಾಂಬುಜವ ತೋರುತ

ತ್ವರಿತದಲಿ ಓಡೋಡಿ ಬಾ ಬಾ ||ಬಾರೋ||

ಭಜನೆಗಳು