ಊಟಕ್ಕೆ ಬಂದೆವು

 

ಊಟಕ್ಕೆ ಬಂದೆವು ನಾವು 

ನಿಮ್ಮ ಆಟ ಪಾಟವ ಬಿಟ್ಟು ಅಡುಗೆ ಮಾಡಮ್ಮ     ||ಪ|| 

ಕತ್ತಲಿಟ್ಟಾವಮ್ಮ ಕಣ್ಣು 

ಬಾಯಿ ಬತ್ತಿ ಬರುತಲಿದೆ ಕೈಕಾಲು ಝುಮ್ಮ|

ಹೊತ್ತು ಹೋಗಿಸಬೇಡವಮ್ಮ 

ಒಂದು ತುತ್ತಾದರು ಇತ್ತು ಸಲಹು ನಮ್ಮಮ್ಮ    ।।ಊಟಕ್ಕೆ।।

ಒಡಲೊಳಗೆ ಉಸಿರಿಲ್ಲವಮ್ಮ 

ಒಂದು ಕ್ಷಣವಾದರೆ ಜೀವ ನಿಲ್ಲುವುದಿಲ್ಲ| 

ಮಡಿದರೆ ದೋಷ ತಟ್ಟುವುದು

ಒಂದು ಹಿಡಿ ಅಕ್ಕಿಯಿಂದಲೆ ಕೀರ್ತಿ ಬಾಹೋದು    ।।ಊಟಕ್ಕೆ।।

ಹೊನ್ನರಾಶಿಯ ತಂದು ಸುರಿಯೆ 

ಕೋಟಿ ಕನ್ನಿಕೆಯರ ತಂದು ಧಾರೆಯನೆರೆಯೆ |

ಅನ್ನದಾನಕ್ಕಿನ್ನು ಸರಿಯೆ 

ಪ್ರಸನ್ನ ಪುರಂದರ ವಿಠಲ ನೀ ಹೇಳೋ ದೊರೆಯೆ      ।।ಊಟಕ್ಕೆ।।