ಲಾಲಿ ಗೋವಿಂದ ಲಾಲಿ

 

ಲಾಲಿ ಗೋವಿಂದ ಲಾಲಿ ಕೌಸಲ್ಯ

ಬಾಲ ಶ್ರೀರಾಮ ಲಾಲಿ  ||ಪ||

ಲಾಲಿ ಮುನಿವಂದ್ಯ  ಲಾಲಿ  

ಜಾನಕಿ ರಮಣ  ಶ್ರೀ ರಾಮ  ಲಾಲಿ            ||ಅ. ಪ||

ಆಶ್ಚರ್ಯಜನಕವಾಗಿ  

ನಿರ್ಮಿಸಿದ ಪಚ್ಚೆಯ ತೊಟ್ಟಿಲಲ್ಲಿ

ಅಚ್ಯುತಾನಂತನಿರಲು

ತೂಗಿದರು ಮತ್ಸ್ಯಾವತಾರ ಹರಿಯ        ||

ಧರ್ಮಸ್ಥಾಪಕನು ಎಂದು 

ನಿರವಧಿಕ ನಿರ್ಮಲ ಚರಿತ್ರನೆಂದು

ಮರ್ಮ ಕರ್ಮಗಳ ಪಾಡಿ 

ತೂಗಿದರು ಕೂರ್ಮಾವತಾರ  ಹರಿಯ       ||ಲಾಲಿ||

ಸರಸಿಜಾಕ್ಷಿಯರೆಲ್ಲರು 

ಜನವಶೀ ಕರ ದಿವ್ಯರೂಪನೆಂದು

ಪರಮ ಹರುಷದಲಿ ಪಾಡಿ 

ತೂಗಿದರು ವರಾಹವತಾರ  ಹರಿಯ        ||

ಕರಿ ಕುಂಭಗಳ  ಪೋಲುವ 

ಕುಚದಲ್ಲಿ ಹಾರ  ಪದಕವು ಹೊಳೆಯಲು

ವರವರ್ಣಿನಿಯರು ಪಾಡಿ 

ತೂಗಿದರು ನರಸಿಂಹಾವತಾರ ಹರಿಯ           ||ಲಾಲಿ||

ಭಾಮಾಮಣಿಯರೆಲ್ಲರು 

ಯದುವಂಶ ಸೋಮನಿವನೆಂದು ಪೊಗಳಿ

ನೇಮದಿಂದಲಿ ಪಾಡಿ 

ತೂಗಿದರು ವಾಮನವತಾರ ಹರಿಯ        ||

ಸಾಮಜವರದನೆಂದು 

ಅತುಳ ಭೃಗು ರಾಮವತಾರನೆಂದು

ಶ್ರೀಮದಾನಂದ ಹರಿಯ

ತೂಗಿದರು ಪ್ರೇಮಾತಿರೇಕದಿಂದ         ||ಲಾಲಿ||

ಕಾಮನಿಗೆ ಕಾಮನೆಂದು 

ಸುರಸಾರ್ವ ಭೌಮ ಗುಣಧಾಮನೆಂದು

ವಾಮನೇತ್ರೆಯರು ಪಾಡಿ 

ತೂಗಿದರು ರಾಮಾವತಾರಿಯ ಹರಿಯ   ||

ಸೃಷ್ಟಿಯ ಕರ್ತನೆಂದು

ಜಗದೊಳಗೆ ಶಿಷ್ಟ ಸಂತುಷ್ಟನೆಂದು

ದೃಷ್ಟಾಂತರಹಿತನೆಂದು 

ತೂಗಿದರು ಕೃಷ್ಣಾವತಾರ  ಹರಿಯ          ||ಲಾಲಿ||

ವೃದ್ಧ  ನಾರಿಯರೆಲ್ಲರು 

ಜಗದೊಳು ಪ್ರಸಿದ್ಧನಿವನೆಂದು ಪೊಗಳಿ

ಬದ್ಧಾನುರಾಗದಿಂದ 

ತೂಗಿದರು ಬೌದ್ಧಾವಾತಾರಿಯ ಹರಿಯ       ||

ತಲತಲಾಂತರದಿಂದ 

ರಂಜಿಸುವ ಮಲಯಜ ಲೇಪದಿಂದ

ಜಲಜಗಂಧಿಯರು ಪಾಡಿ 

ತೂಗಿದರು ಕಲ್ಕ್ಯಾವತಾರ ಹರಿಯ           ||ಲಾಲಿ||

ಆನಂದ ಸದನದೊಳಗೆ

ಗೋಪಿಯರು ಆ ನಂದಸುತನ ಕಂಡು

ಆನಂದಭರಿತರಾಗಿ 

ತೂಗಿದರು ಆನಂದಭೈರವಿಯಿಂದ        ||

ನೀಲಘನಲೀಲ ಜೋ ಜೋ 

ಕರುಣಲ ವಾಲ ಶ್ರೀಕೃಷ್ಣ ಜೋ ಜೋ

ಲೀಲಾವತಾರ  ಜೋ ಜೋ 

ಪರಮಾತ್ಮ ಬಾಲಗೋಪಾಲ  ಜೋ ಜೋ       ||ಲಾಲಿ||

ಇಂಧುಧರಮಿತ್ರ ಜೋ ಜೋ

ಶ್ರೀಕೃಷ್ಣ ಇಂಧು ರವಿನೇತ್ರ ಜೋ ಜೋ

ಇಂಧು  ಕುಲಪುತ್ರ ಜೋ ಜೋ 

ಪರಮಾತ್ಮ ಇಂದಿರಾರಮಣ  ಜೋ ಜೋ         ||

ತುಂಗ ಭವಭಂಗ  ಜೋ ಜೋ 

ಪರಮಾತ್ಮ ರಂಗ  ಕೃಪಾಂಗ ಜೋ ಜೋ

ಮಂಗಳಾಪಾಂಗ ಜೋ ಜೋ 

ಮೋಹನಾಂಗ ರಂಗವಿಠಲನೆ  ಜೋ ಜೋ          ||ಲಾಲಿ||