ತಿರುಪತಿ ವೆಂಕಟರಮಣ

 

ತಿರುಪತಿ ವೆಂಕಟರಮಣ

ನಿನಗೇತಕೆ ಬಾರದು ಕರುಣ|

ನಂಬಿದೆ ನಿನ್ನಯ ಚರಣ

ಪರಿಪಾಲಿಸಬೇಕೊ ಕರುಣ ಕರುಣಾ ||ಪ||

ಅಳಗಿರಿಯಿಂದಲಿ ಬಂದಾ

ಸ್ವಾಮಿ ಅಂಜನಗಿರಿಯಲಿ ನಿಂದ|

ಕೊಳಲ ಧ್ವನಿಯದೋ ಚಂದ

ನಮ್ಮ ಕುಂಡಲರಾಯ ಮುಕುಂದ ಮುಕುಂದ ||ತಿರುಪತಿ||

ಮೂಡಲಗಿರಿಯಲಿ ನಿಂತ

ಮುದ್ದು ವೆಂಕಟಪತಿ ಬಲವಂತ |

ಈಡಿಲ್ಲ ನಿನಗೆ ಶ್ರೀಕಾಂತಾ

ಈರೇಳು ಲೋಕಕನಂತ ಅನಂತ ||ತಿರುಪತಿ||

ಕಾಶೀ ರಾಮೇಶ್ವರದಿಂದ

ಅಲ್ಲಿ ಕಾಣಿಕೆ ಬರುವುದೆ ಚಂದ |

ದಾಸರ ಕೂಡೆ ಗೋವಿಂದ..

ಅಲ್ಲಿ ದಾರಿ ನಡೆವುದೇ ಚೆಂದ... ಚೆಂದ ||ತಿರುಪತಿ||

ಪಾಪ ವಿನಾಶಿನಿ ಸ್ನಾನ

ಹರಿ ಪಾದೋದಕವೇ ಪಾನ |

ಕೋಪತಾಪ ನಿಧಾನ.. 

ನಮ್ಮ ಪುರಂದರವಿಠಲನ ಧ್ಯಾನ.. ಧ್ಯಾನಧ್ಯಾನ ||ತಿರುಪತಿ||