ನಂಬಿದೆ ನಿನ್ನ ಪಾದವ

 

ನಂಬಿದೆ ನಿನ್ನ ಪಾದವ, ವೆಂಕಟರಮಣ

ನಂಬಿದೆ ನಿನ್ನ ಪಾದವ ||ಪ||

ನಂಬಿದೆ ನಿನ್ನ ಪಾದಾಂಬುಜಯುಗಳವ

ಚಂದದಿ ಸಲಹೋ ಮಂದರಧರನೆ ||ಅಪ||

ತಂದೆಯಾಗಿ ನೀನೇ ತಾಯಿಯು ನೀನೇ

ಬಂಧುಬಳಗವು ನೀನೆ |

ಬಂದ ದುರಿತವೆಲ್ಲ ಹೊಂದಿಕೊಳ್ಳದಂತೆ

ಬಂದೆನ್ನ ಸಲಹೋ ಮುಕುಂದಮುರಾರಿ ||ನಂಬಿದೆ||

ಚಿಕ್ಕಂದು ಮೊದಲು ನಾನು 

ನಿನ್ನಯ ಪಾದ ಹೊಕ್ಕು ಜೀವಿಸುತಿಹೆನು |

ಘಕ್ಕನೆ ಜ್ಞಾನವ ಅಕ್ಕರದಿಂದಲೆ ಕೊಡು

ಮಕ್ಕಳ ಮಾಣಿಕ್ಯ ರುಕ್ಮಿಣಿಯರಸ ||ನಂಬಿದೆ||

ಮರೆತು ಮಾಯದೊಳು 

ಮುಳುಗಿದೆ ಮಾಯವರಿತು ಅರಿಯದಾದೆ |

ಮರೆಯದೆ ಎನ್ನನು ಸಲಹೊ ಕೃಪಾನಿಧಿ

ವರದ ಶ್ರೀವೆಂಕಟ ಪುರಂದರವಿಠಲ ||ನಂಬಿದೆ||