ಗುರುವಿನ ಗುಲಾಮ

 

ಗುರುವಿನ ಗುಲಾಮನಾಗುವ ತನಕ ದೊರೆಯದಣ್ಣ ಮುಕುತಿ ||ಪ||

ಪರಿಪರಿ ಶಾಸ್ತ್ರವನೋದಿದರೇನು ವ್ಯರ್ಥವಾಯಿತು ಭಕುತಿ ||ಅ ಪ||

ಆರು ಶಾಸ್ತ್ರವನೋದಿದರೇನು

ನೂರಾರು ಪುರಾಣವ ಮುಗಿಸಿದರೇನು |

ಸಾಧು ಸಜ್ಜನರ ಸಂಗವ ಮಾಡದೆ 

ಧೀರನಾಗಿ ತಾ ಬೇಡಿದರೇನು ||ಗುರುವಿನ||

ಕೊರಳೊಲು ಮಾಲೆ ಧರಿಸಿದರೇನು 

ಬೆರಳೊಲು ಜಪಮಣಿ ಎಣಿಸಿದರೇನು |

ಮರಳಿ ಮರಳಿ ತಾ ಹೊರಳಿ ಬೂದಿಯೊಳು  

ಮರುಳನಂತಾಗಿ ತಿರುಗಿದರೇನು  ||ಗುರುವಿನ||

ನಾರಿಯ ಭೋಗ ಅಳಿಸಿದರೇನು 

ಶರೀರ ಸುಖವ ಬಿಡಿಸಿದರೇನು |

ಮಾರಾಜನಕ ಶ್ರೀ ಪುರಂದರವಿಠಲನ

ಸೇರಿಕೊಂಡು ತಾ ಬೆಳೆಯುವ ತನಕ ||ಗುರುವಿನ||