ರಾಜ ಬೀದಿಯೊಳಗಿಂದ

 

ರಾಜ ಬೀದಿಯೊಳಗಿಂದ ಕಸ್ತೂರಿ ರಂಗ

ತೇಜನೇರಿ ಮೆರೆದು ಬಂದಾ || ಪ ||

ಸುತ್ತಮುತ್ತಲು ಸಾವಿರಾರು ಸಾಲು ದೀವಿಗೆ

ಹತ್ತು ದಿಕ್ಕಲಿ ಬೆಳಗುತ್ತಿದ್ದ ಹಗಲು ಬತ್ತಿಯು

ವಿಸ್ತಾರದಿ ಭೂಸುರರು ಸುತ್ತುಗಟ್ಟಿ ನಿಂತಿರಲು

ಮತ್ತೆ ನಮ್ಮೊಳೆಂತೊ ತೇಜ ಮೆಲ್ಲನೆ ನಡೆಸುತ್ತ ಜಾಣ || ರಾಜ ||

ತಾಳ ಶಂಖ ಭೇರಿ ತಂಬೂರಿ ಮೊದಲಾದ

ಮೇಲು ಪಂಚಾಗಗಳೆಲ್ಲ ಹೊಗಳಿ ಪಾಡಲು

ಗಾಳಿಗೋಪುರದ ಮುಂದೆ ಧಾಳಿಯಾಡುತ ಸುತ್ತ

ಧೂಳುಗಳನ್ನೆಬ್ಬಿಸಿ ವೈಯಾಳಿಸಿ ನಿಕ್ಕುತ ಜಾಣ || ರಾಜ ||

ವೇದಘೋಷದಿಂದ ವಂದಿಸಿ ಪೊಗಳಲು

ಮೋದದಿಂದ ಗಾಯಕರು ಹಾಡಿ ಪಾಡಲು

ಹಾದಿ ಬೀದಿಯಲ್ಲಿ ನಿಂತ ಭೂಸುರಿಗೆಲ್ಲಾ

ಆದರ ಇಷ್ಟಾರ್ಥವಿತ್ತು ಮೋದದಿ ಮನ್ನಿಸುವ ಜಾಣ || ರಾಜ ||

ರಂಭೆ ಮೊದಲಾದ ಸುರರಮಣಿಯರು

ತುಂಬಿದ ಆರತಿಯ ಪಿಡಿದು ಕೂಡಿ ಪಾಡಲು

ಶಂಭು ಮುಖ ನಿರ್ಜನರೆಲ್ಲ ಸ್ವಾಮಿ ಪರಾಕೆನ್ನುತ

ಅಂಬುದಿ ಭವಾದ್ಬಿಗಳ ಆಳಿದ ಶ್ರೀರಂಗನಾಥ || ರಾಜ ||

ಹಚ್ಚನಗೆ ಸಾರು ಬೇಳೆ ಹಾಲು ಕೆನೆಗಳು

ಮುಚ್ಚಿ ತಂದ ಕೆನೆ ಮೊಸರು ವೀಸಲು ಬೆಣ್ಣೆಯು

ಹಚ್ಚಿ ತುಪ್ಪ ಪಕ್ವವಾದ ಅತಿರಸ ಹುಗ್ಗಿಯನ್ನು

ಮೆಚ್ಚಿ ಉಂಡು ಪಾನಕ ನೀರ್ ಮಜ್ಜಿಗೆಗಳ ಸವಿದು ಬೇಗ || ರಾಜ ||

ಮುತ್ತಿನ ತುರಾಯಿ ಮುಂಡಾಸದಿ

ತತ್ತಳಿಪ ತಾಳಿ ವಜ್ರ ತಾಳಿ ಚೌಕಳಿ 

ಮುತ್ತಿನ ಕುಂಡಲನಿಟ್ಟು ಮೋಹಿಸುತ್ತ ಬೀದಿಯಲ್ಲಿ 

ಕತ್ತಿಯ ಮುಡಿಯಲಿ ಕಟ್ಟಿ  ಕೈಯಲ್ಲಿ ತೇಜಿಯ ಪಿಡಿದು  || ರಾಜ ||

ಸಣ್ಣ ಮುತ್ತು ಕೆತ್ತಿಸಿದ ಸಕಲಾಧಿಗಳು

ಹೊನ್ನಹೊಸ ಜಾನ ಜಂಗುಳಿ ಹೊಳೆವಸೊಬಗಿನ

ಉನ್ನತ ಪಾರಾಯಣ ಉತ್ತಮರಾ ಜಶ್ವವೇರಿ

ಎನ್ನ ಹಯವದನರಂಗ ಎಲ್ಲರಿಗಷ್ಟಾರ್ಥಕೊಡುತ || ರಾಜ ||