ಭೂಷಣಕೆ ಭೂಷಣ

 

ಭೂಷಣಕೆ ಭೂಷಣ ಇದು ಭೂಷಣ

ಶೇಷಗಿರಿವಾಸ ಶ್ರೀ ವೆಂಕಟೇಶ ||ಪ||

ನಾಲಿಗೆಗೆ ಭೂಷಣ ನಾರಾಯಣನ ನಾಮ

ಕಾಲಿಗೆ ಭೂಷಣ ಹರಿಯಾತ್ರೆಯು |

ಆಲಯಕೆ ಭೂಷಣ ತುಲಸಿ ವೃಂದಾವನ 

ವಿಶಾಲ ಕರ್ಣಕೆ ಭೂಷಣ ವಿಷ್ಣುಕಥೆಯು ||ಭೂಷಣ||

ದಾನವೇ ಭೂಷಣ ಇರುವ ಹಸ್ತಂಗಳಿಗೆ

ಮಾನವೇ ಭೂಷಣ ಮಾನವರಿಗೆ |

ಜ್ಞಾನವೇ ಭೂಷಣ ಮುನಿಯೋಗಿವರರಿಗೆ

ಮಾನಿನಿಗೆ ಭೂಷಣ ಪತಿಭಕ್ತಿಯು ||ಭೂಷಣ||

ರಂಗನನು ನೋಡುವುದೇ ಕಂಗಳಿಗೆ ಭೂಷಣ

ಮಂಗಳಾಂಗಗೆ ಮಣಿವ ಶಿರ ಭೂಷಣ |

ಶೃಂಗಾರ ತುಲಸಿ ಮಣಿ ಕೊರಳಿಗೆ ಭೂಷಣ

ರಂಗವಿಠಲ ನಿಮ್ಮ ನಾಮ ಅತಿ ಭೂಷಣ ||ಭೂಷಣ||