ಈ ಪರಿಯ ಸೊಬಗಾವ

 

 ಈ ಪರಿಯ ಸೊಬಗಾವ ದೇವರಲಿ ಕಾಣೆ    ।।ಪ।।
ಗೋಪೀಜನಪ್ರಿಯ  ಗೋಪಾಲಗಲ್ಲದೆ    ।।ಅ.ಪ।।

ದೊರೆಯತನದಲಿ ನೋಡೆ ಧರಣಿದೇವಿಗೆ ರಮಣ 
ಸಿರಿಯತನದಲಿ ನೋಡೆ ಶ್ರೀಕಾಂತನು |
ಹಿರಿಯತನದಲಿ ನೋಡೆ ಸರಸಿಜೋದ್ಭವನಯ್ಯ 
ಗುರುವುತನದಲಿ ನೋಡೆ ಜಗದಾದಿಗುರುವು        ।।ಈ।।

ಪಾವನತ್ವದಿ ನೋಡೆ ಅಮರಗಂಗಾಜನಕ 
ದೇವತ್ವದಲಿ ನೋಡೆ ದಿವಿಜರೊಡೆಯ |
ಲಾವಣ್ಯದಲಿ ನೋಡೆ ಲೋಕಮೋಹಕನಯ್ಯ 
ಆವಾ ಧೈರ್ಯದಿ ನೋಡೆ ಅಸುರಾಂತಕ              ।।ಈ।।

ಗಗನದಲಿ ಸಂಚರಿಪ ಗರುಡದೇವನೆ ತುರುಗ 
ಜಗತೀಧರ ಶೇಷ ಪರಿಯಂಕ ಶಯನ |
ನಿಗಮಗೋಚರ ಪುರಂದರವಿಠಲಗಲ್ಲದೆ 
ಮಿಗಿಲಾದ ದೈವಗಳಿಗೀ ಭಾಗ್ಯವುಂಟೆ                   ।।ಈ।।