ಇಷ್ಟು ದಿನ ಈ ವೈಕುಂಠ

 

ಇಷ್ಟು ದಿನ ಈ ವೈಕುಂಠ

ಎಷ್ಟು ದೂರವೋ ಎನ್ನುತಲಿದ್ದೆ|

ದೃಷ್ಟಿಯಿಂದಲಿ ನಾನು ಕಂಡೆ

ಸೃಷ್ಟಿಗೀಶನೇ ಶ್ರೀರಂಗಶಾಯಿ ||ಪ||

ಎಂಟು ಏಳನು ಕಳೆದುದರಿಂದೆ

ಬಂಟರೈವರ ತುಳಿದುದರಿಂದೆ |

ಕಂಟಕನೊಬ್ಬನ ತರಿದುದರಿಂದೆ

ಬಂಟನಾಗಿ ಬಂದನೋ ಶ್ರೀರಂಗಶಾಯಿ ||ಇಷ್ಟು||

ವಜ್ರ ವೈಢೂರ್ಯದ ತೊಲೆಗಳ ಕಂಡೆ

ಪ್ರಜ್ವಲಿಪ ಮಹಾದ್ವಾರವ ಕಂಡೆ |

ನಿರ್ಜರಾದಿ ಮುನಿಗಳ  ನಾ ಕಂಡೆ

ದುರ್ಜನಾಂತಕನೆ ಶ್ರೀರಂಗಶಾಯಿ ||ಇಷ್ಟು||

ರಂಭೆ ಊರ್ವಶಿ ಮೇಳವ ಕಂಡೆ

ತುಂಬುರು ಮುನಿ ನಾರದರನು ಕಂಡೆ |

ಅಂಬುಜೋದ್ಭವ ರುದ್ರರ ಕಂಡೆ

ಶಂಬರಾರಿ ಪಿತನೇ ಶ್ರೀರಂಗಶಾಯಿ ||ಇಷ್ಟು||

ನಾಗಶಯನನ ಮೂರುತಿ ಕಂಡೆ

ಭೋಗಿ ಭೂಷಣ ಶಿವನನು ಕಂಡೆ |

ಭಾಗವತರ ಸಮ್ಮೇಳವ ಕಂಡೆ

ಕಾಗಿನೆಲೆಯಾದಿಕೇಶವನ ನಾ ಕಂಡೆ ||ಇಷ್ಟು||