ನೀನ್ಯಾಕೋ ನಿನ್ನ ಹಂಗ್ಯಾಕೋ

ನಿನ್ನ ನಾಮದ ಬಲವೊಂದಿದ್ದರೆ ಸಾಕೊ ||ಪ||

ಕರಿಮಕರಿಗೆ ಸಿಕ್ಕಿ ಮೊರೆಯಿಡುತಿರುವಾಗ

ಆದಿಮೂಲವೆಂಬೋ ನಾಮವೆ ಕಾಯ್ತೊ ||ನೀನ್ಯಾಕೋ||

ಪ್ರಹ್ಲಾದನ ಪಿತ ಬಾಧಿಸುತಿರುವಾಗ

ನಾರಸಿಂಹನೆಂಬ ನಾಮವೆ ಕಾಯ್ತೊ ||ನೀನ್ಯಾಕೋ||

ಆ ಮರ ಈ ಮರ ಧ್ಯಾನಿಸುತಿರುವಾಗ

ರಾಮ ರಾಮ ಎಂಬ ನಾಮವೆ ಕಾಯ್ತೊ ||ನೀನ್ಯಾಕೋ||

ನಾರಿಯನೆಳೆತಂದು ಸೀರೆಯ ಸೆಳೆವಾಗ

ಕೃಷ್ಣ ಕೃಷ್ಣ ಎಂಬೋ ನಾಮವೆ ಕಾಯ್ತೊ ||ನೀನ್ಯಾಕೋ||

ಯಮನ ದೂತರು ಬಂದು ಅಜಮಿಳನೆಳೆವಾಗ

ನಾರಾಯಣ ಎಂಬೋ ನಾಮವೇ ಕಾಯ್ತೋ ||ನೀನ್ಯಾಕೋ||

ಹಸುಳೆ ಆ ಧ್ರುವರಾಯ ಅಡವಿಗೆ ಪೋದಾಗ

ವಾಸುದೇವನೆಂಬೋ ನಾಮವೆ ಕಾಯ್ತೊ ||ನೀನ್ಯಾಕೋ||

ನಿನ್ನ ನಾಮಕೆ ಸರಿ ಕಾಣೆನೊ ಜಗದೊಳು

ಘನ್ನ ಮಹಿಮ ಸಿರಿ ಪುರಂದರವಿಠಲ ||ನೀನ್ಯಾಕೋ||

ಭಜನೆಗಳು